للشاعر :  ابو فاطمة الرويمي

ياليل

اون وعيوني مدري شمالها تسيل

كامت على خدودي تحفراخدود

تحن روحي وتنادي الليل ياليل

جايمته علي بحبابي اتجود

غريب اهنا يليل او فاكد الحيل

وترجى الضعون الشاته اتعود

كضاني الصبر يمته اخيامك اتشيل

ويرد ذاك الصباح ابهجته اردود

يليل او هل كلب نحلان وعليل

مابطل بواجي ولا رضى يهود

شجاك وياي دومك لاكد الخيل

وانا وحيد ماضلتلي جنود

شجاك او بالكلب كالساعه اتعيل

وفوكه اترادفن نكباتك السود

ذبل عودي ابأقل نسمة هوى ايميل

شيصبره على ريح لعاتية العود

يغم عمري الخلص نوح اوتواسيل

ويغم روحي لتناطر ذيج الوعود

هلي وفراككم ماينجرع حيل

هدم حيلي ودهاني وشل الازنود

متى اوياكم اتلاكى يابهاليل

يكرام الطبايع ها يالحيود

يالبحبكم غديت انثر مواويل

وسلي الروح بيكم بلكي اتهود

عكب صدر المجالس هالصرت ذيل

او عكب حل المشاكل صرت معكود

صرت شاة اوعليه اذيابها اتعيل

شتحمل يصاح اوصرت فرهود

                الشعر الشعبي العراقي